ليه منستغلش الحدائق العامة لنعلم الاطفال و نتكلم سوى؟

DSC_0682

القاهرة أو مصر بوجه عام فيها جناين و حدائق عامة كتير سواء في الميادين أو حدائق مخصصة. دائماً بنلاقي نفسنا معديين من قدام الحدائق القريبة من بيوتنا و نلاقيها فاضية، خالية من الناس، مع إن حواليها عمارات كثيرة تتميز بالكثافة السكانية. الواحد بيلاقي الشوارع زحمة و الحدائق فاضية حتى في نهاية الاسبوع. بنلاقي برضه إن الناس الاهل منطقة واحدة م بيعرفوش بعض، أخرك عرف جيرانك الساكنين قصادك أو في الدور الي فوقك.

أكيد في حاجة ممكن تلم ناس منطقة واحدة مع بعض، و فكرنا إن ممكن نستغل الحدائق فى الموضوع ده. تخيل إن يوم الجمعة من كل شهر كل الناس من نفس المنطقة ينزلوا الشارع. مش عشان تظاهر ولا حاجة، بس عشان يقضوا كام ساعة حلوين مع بعض. الاطفال ييجوا يلعبوا و يلونوا و يتعلموا حاجة جديدة، الشباب ييجوا يتعرفوا  على شباب زيهم من نفس المنطقة و يلعبوا مع الاطفال و يبتدوا مناقشات ازاي ممكن يخلوا المنطقة العايشين فيها أحسن. الاهالي و الكبار ييجوا يتكلموا مع بعض و يفكروا مع الشباب بخبرتهم و اتصالاتهم.

الصورة دي مش خيال و لا هي مجرد فكرة. دي حاجة شفناها بعنينا لما بدأنا الفكرة دي في حديقة عامة في المريلاند في مصر الجديدة. مكلفتناش أي حاجة: مجرد ورق و  ألوان. بدأنا نلون، الاطفال الى معديين لاقونا حبو ييجو يشاركوا. لعبنا بعدها شوية ألعاب

نعلم فيها الاطفال عن البيئة و النظافة، الاهالي قعدوا يتكلموا مع بعض، شوية شباب من الحي شافونا و تحمسوا ييجوا يلعبوا مع الاطفال. شباب تانية جت تلعب مزيكة. كل ده من غير ولا مليم.

حلمنا فعلاً إن الفكرة تنتشر و كل شباب منطقة واحدة ينظموا اليوم ده في المنطقة الى عايشين فيها و يشجعوا أهل المنطقة ينزلوا. تخيلوا إيه الافكار التانية الممكن تتم لو كل واحد فينا مرة أو مرتين في الشهر نزل يقضي يوم جميل مع جيرانه و أهل المنطقة الي عايش فيها و نشوف إيه الممكن يحصل.

للمزيد من المعلومات عن اليوم القادم في المهندسين إضغط هنا

You can leave a response, or trackback from your own site.

Leave a Reply